Gündəlik kalori sərfinin hesablanması

Enerji, qəbul etdiyimiz bütün qidaların birləşməsindən alınır. Ancaq hər qida fərqli şəkildə istifadə edilir. Məsələn, 1 boşqab meyvə yeməklə, 1 boşqab makaron yemək eyni deyil.

Gündəlik kalori hesabınızı necə apara bilərsiniz, öyrənmək istəyirsinizmi? Bugünkü yazımızda kalori hesabı üçün bəzi texnikaları sizinlə bölüşəcəyik.

Hər şeydən kalori və ya enerji yandırmağın nə olduğunu bilmək lazımdır. Kalori yandırmaq orqanizmin qəbul etdiyi ilə sərf etdiyi miqdarın arasındakı münasibətdir.

Orqanizmin bütün  “işlərini” yerinə yetirməsi üçün, minimum səviyyədə kalori qəbul etməsi lazımdır. Bu miqdar səviyyəsindən az aldıqda orqanizm “depo”dakı enerjidən istifadə edir. Beləliklə, çəki itirmiş olursunuz. Lazımından artıq kalori qəbul etdikdə isə bu enerji depolanır və çəkiniz artır. Gördüyünüz kimi, çəki atmaq, yaxud artırmaq istəyirsinizsə, kalori hesabınızı düzgün aparmalısınız. Bəs kalori hesabı necə aparılır? Bu gün sizinlə kalori hesablanmasının ən sadə və məşhur üsullardan biri ilə; Herris Benedict üsulu ilə tanış edəcəyik.

Kalori hesablamaqda 4 əsas faktor var: çəki, boy, yaş və cinsiyyət. Təbii ki, qadın orqanizmi ilə kişi orqanizminin kalori qəbulu və sərfi fərqlidir.

Gündəlik nə qədər kalori almalı olduğunuzun hesablanması qadınlar üçün: 655 + (9,6 × kiloqram, çəkiniz) + (1,8 × santimetr, boyunuz) – (4,7 × yaşınız)

Gündəlik nə qədər kalori almalı olduğunuzun hesablanması kişilər üçün: 66+ (13,7 × kiloqram, çəkiniz) + (5 × santimetr, boyunuz) – (6,5 × yaşınız)

Məsələn, 60 kiloqram ağırlığında 1,70 boyunda, 30 yaşlı bir qadının gündəlik kalori sərfini hesablayaq: 665 + (9,6 × 60) + (1,8 × 170) – (4,7 ×30)  = 1396 kalori.

95 kiloqram ağırlığında, 1,90 boyunda, 45 yaşında kişi üçün gündəlik kalori sərfi: 66 + (13,7 x 95) + (5 x 190) – (6,5 x 45) = 2025 kalori.

Bu məlumatlardan şəxsin gündəlik nə qədər kalori itirdiyini həyat tərzinə uyğun hesablaya bilərik. Heç bir idmanla məşğul olmursunuzsa, nəticənizi 1,2-ə vurun. Həftədə 1 və ya 2-3 dəfə idman edənlərdənsinizsə, nəticəni 1,375-ə vurun. Həftədə 3 və ya 5 dəfə məşq edirsinizsə, nəticənizi 1,55-ə vurun. Çox yoğun məşq edən idmançılar üçün (həftədə 6-7 gün) bu rəqəm 1,725-ə, elit idmançılar üçün isə 1,9-dur.

Əvvəlki misalda qadının həftədə 3 dəfə idman zalına getdiyini düşünək. Bu zaman; 1396 × 1,375 = 1919,5. Misaldakı kişi bazar ertəsindən cüməyə qədər məşq edirsə, nəticə; 2025 × 1,55 = 3138,75 olar.

Məqsədiniz, çəki itirməkdirsə, alınan nəticədən daha az kalori qəbul etməlisiniz. Yox, əksinə, əzələ kütlənizi, çəkinizi artırmağa çalışırsınızsa, onda nəticənizdən daha çox kalori qəbul etməlisiniz.