Bel incəldən məşqlər

Düz bir qarına və daha incə belə sahib olmaq istəyirsinizsə, bu yazımız marağınıza səbəb ola bilər.

Belinizi incəltməyin çox çətin olduğunu düşünə bilərsiniz, bir çox insana görə, bel ətrafında yığılan yağ ən çətin yandırılan yağdır. Amma bugünkü yazımızda sizə belinizi incəldə biləcəyiniz 6 kardio məşqi tövsiyə edəcəyik. Bir şeyi də unutmaq lazım deyil ki, elədiyiniz kardio məşqlərindən əlavə, qidalanmanıza da fikir verməli, lif, meyvə və tərəvəz ağırlıqlı pəhrizə əməl etməlisiniz. Bunun üçün bir professionalla məsləhətləşə bilərsiniz.

Belinizi incəltmək və daha düz qarına sahib olmaq istəyirsizsə, yazımızın bundan sonrakı qismində bəhs edəcəyimiz 6 məşqdən birini seçib məşq siyahınıza əlavə edə bilərsiniz.

Pilləkən çıxmaq. Pilləkən çıxmaq tam kardio məşqi hesab edilməsə də, faydası və effekti göz qabağına gətiriləndə mütləq əməl edilməli məşqdir. Evinizdə pilləkən olmasa da, yaşadığınız binada, iş yerinizdə pilləkən mütləq vardır. Onları çıxıb düşərək, məşq edə bilərsiniz.

Velosiped sürmək. Velosiped belinizi incəltmək üçün edəcəyiniz ən effektli və əyləncəli məşqdir. Açıq havanın dadını çıxarmaq üçün parkda velosipedlə gəzintiyə çıxa bilərsiniz.

Hətta, velosipedi nəqliyyat vasitəsi kimi istifadə edə bilərsiniz. Bir başqa alternativiniz isə idman zalında olan sabit velosipedlərdir. Bir yandan televizora baxanda, digər yandan məşqinizi edə bilərsiniz.

Qaçmaq. Qaçış hər gün daha populyar məşq halına gəlir. Qaçış insanların sağlamlığı və yağ yandırmağı üçün ən effektli məşq növüdür.

Əvvəllər heç vaxt qaçmamısızsa, yüksək templi yerişlə məşq etməyə başlaya bilərsiniz. Qaçmağı tezliklə sevəcəksiniz. Qaçmaq təkcə belinizi incəltmir, həmçinin, dizlərinizi gücləndirir, əzələlərinizi şəkilləndirir və ruh halınızı yaxşılaşdırır.

Üzmək. Üzməyi bacarıb-bacarmamağınız vacib deyil. Suda  sadəcə qollarınızı və ayaqlarınızı hərəkət etdirməyiniz belə bir neçə kiloqram itirməyinizə səbəb olacaq. Həmçinin, üzmək ürək-damar sisteminiz gücləndirməklə yanaşı, bütün əzələlərinizi işlədib, şəkilləndirir.

Padel. Padel tennisin bel incəldən kardio məşqi olması ağlınıza gəlməmiş ola bilər. Lakin 1 saat padel oynamaq 600 kalori yandırmağa bərabərdir. Həmçinin, koordinasiya, güc və çeviklik kimi refleksləriniz də inkişaf etmiş olur.

Padel oynayarkən, partnyorunuz varsa, daha çox əylənəcək, açıq havanın dadını çıxaracaq və vaxtın necə keçdiyini hiss etməyəcəksiniz.

Elliptik velosiped.  Bu avadanlıqla eyni vaxtda qollarınızı, ayaqlarınızı və qarın əzələlərinizi işlədə bilərsiniz. Bu velosipeddə beliniz düz bir şəkildə ayaq üstə durduğunuz üçün, hərəkətlərin çoxunu qollar və ayaqlar etmiş kimi görünsə də, digər yandan qarın əzələləriniz də dayanmadan işləyir.

Belinizi incəltmək üçün məşqlər bunlarla sərhədli qalmır, həmçinin, yoqa, zumba, boks, spining  kimi məşqlərlə də belinizi incəldə bilərsiniz.