Şərq rəqsi və bədənə faydaları
08-04-2020 1206

Şərq rəqsi və bədənə faydaları

Gün keçdikcə şərq rəqsi idman zallarında daha da məşhurlaşır. Şərq rəqsi, başqa deyişlə, oryantal rəqs həm bədən, həm də zehin üçün çox faydalı “məşq” növüdür. İstənilən rəqs tərkibində bir çox fiziki hərəkətlər kombinasiyasından ibarət olduğu üçün bir növ idman və məşqdir.  

Bir çox insan bu qadınsı və şəhvət yüklü rəqsin faydalarından bixəbərdir. Bu yazımızda sizə bu rəqs haqqında bildiyimiz və maraqlı olan hər şeyi açıqlamaq istəyirik.

Şərq rəqsinin kökləri V əsr Misirinə qədər gedir. Günümüzdə bu rəqsin onlarla fərqli versiyaları var. Rəqsin əsas məqsədi bədənin üzvlərini ayrı-ayrı oynadaraq, bu bölgələr arasındakı bağı qoparmaqdır.

İdman zallarında oryantal rəqslərin müxtəlif formaları üçün dərslər mövcuddur. Oryantal rəqsin təkcə çanaq sümüyünü və ətrafını deyil, bütün əzələləri hərəkətə gətirdiyini nəzərə alsaq, bu o qədər də təəccüblü deyil. Qarın, bel və çiyin əzələlərini daha çox məşq elətdirdiyini vurğulamaq lazımdır.  

Oryantal rəqs hislərinizi ifadə etmək üçün əla bədən dilidir. Yuxarıda da qeyd etdiyimiz kimi, hazırda bu rəqsin onlarla növü var və  hər biri də bədənin ayrı-ayrı bölgələrini idarə etmək üçün sistemləşib.

Bəzi hərəkətlər kürək əzələləri üçün həddindən artıq elastiklik tələb etdiyi üçün əsas təhlükəli məqam əzələ spazmalarıdır. Lakin bu rəqsin əsas üstünlüyü də hər yaşdan insanlar üçün fərqli öyrənmə sürəti və hərəkətlər toplusu olmasıdır.

Oryantal rəqslə çox rahat kalori yandıra bilərsiniz, təkcə, kalori yandırmaqla qalmayıb, həmçinin, bədəninizdə olan artıq yağ və çəkilərdən xilas olub, elastiklik qazanacaqsınız.

Oryantal rəqsin faydaları. Bədəninizə forma verir. Oryantal rəqslə sağlam bir pəhrizi birləşdirsəniz, nəticəsini tezliklə görəcəksiniz. Bədənin bütün əzələlərini hərəkətə gətirdiyi və yüksək miqdarda enerji tələb etdiyi üçün bu rəqslə tezliklə çəki itirə, bədəninizə forma verə bilərsiniz.

Koordinasiyanızı artırır. Bədəninizin etdiyi hərəkətləri sinxron şəkildə edə bilmək üçün koordinasiyaya ehtiyacınız var. Oryantal rəqsin əsas özəlliyi bütün hərəkətləri birlikdə və harmoniya halında etməyi bacarmaqdır. Asan deyil bilirik, amma əzmli olmaq lazımdır. Bir neçə məşq və koordinasiya qabiliyyətiniz güclənəcək.

Stressi azaldır. Oryantal rəqs də digər idmanlar kimi, stressdən uzaqlaşmağa xidmət edir. Dərslər möhtəşəm mahnı sədaları altında aparıldığı üçün, dərsləriniz yadda qalan və əyləncəli olur. Bu da zehniniz bir neçə saatlıq gündəlik problem və qayğılardan uzaqlaşdırır.

Özünüzə hörməti artırır. Son olaraq oryantal rəqs özünüzə olan hörməti artırmaq və ruhi sağlamlığınızı gücləndirmək üçün əla vasitədir. Fərqli, qarışıq hərəkətləri öyrəndikcə, bədəniniz formaya düşdükcə, istər-istəməz əzminizlə qürur duymağa və özünüzü daha çox sevməyə başlayırsınız.

Rəqs deyib keçməyin, hərəkət və kombinasiyaları qarışıq olduğu üçün, çox çətin “məşq” növüdür. Amma saydığımız bu qədər fayda qarşısında çətin olmağa da haqlıdır. Sadəcə özünüzə inanın və başlayın. Həm əylənin, həm sağlam, həm də formada olun.

Endirim və kampaniyalardan xəbərdar olmaq üçün abunə olun.

Agentlər onlayndır
Chat agent
Chat agent
Salam, sizə necə kömək edə bilərik?