Effektli pilates üçün məsləhətlər

Pilates məşqlərini tam olaraq necə edəcəyinizi bilmirsizsə, məşqləri davam etdirməyiniz mənasını itirir. Çünki istənilən nəticəni əldə edə bilməyəcəksiniz. Lakin bu yazımızda sizinlə bölüşəcəyimiz bir neçə ipucu ilə pilates məşqlərinizi effektli edə bilərsiniz.

Təcrübəli məşqçi tapın. Əksərən məşqçimiz yaxşı olmayanda, yaxud təcrübəsiz olanda, siz nə qədər fiziki güc tətbiq etsəniz də, istənilən nəticəni əldə edə bilməyəcəksiniz. Pilatesə başlamağa qərar verəndə bir çox idman zalı sınaq məşqi üçün sizə şans verir. Bəs məşqçi seçəndə nələrə diqqət etməliyik? Məşqçi bütün “tələbələri” ilə birbəbir məşğul olurmu?  Tələbənin potensialına uyğun məşq proqramı hazırlayırmı? Hərəkətləri necə edəcəyinizlə bağlı ətraflı məlumat verməyi bacarırmı? Bütün bunlardan əlavə, məşqçinizlə xarakter uyğunluğunuz da olmalıdır ki, problem yaşamayasız.

Həmçinin, məşqlərə başlamadan əvvəl məşqçinizlə söhbət etməlisiniz.  Pilatesin sizin üçün yeni təcrübə olmasından əlavə, bu məşqlərin yarada biləcəyi narahatlıq və ağrılar barəsində də danışıb məlumatlanmalısız. Sayılan bu şərtləri tamamlayan bir məşqçiniz varsa, pilates təcrübənizə uğurlu başlamısız deməkdir.

Sıxlıq olmayan saatları seçin. Evdə xüsusi pilates avadanlıqlarına sahib deyilsinizsə, pilateslə məşğul olmaq artıq  sizin üçün sosial aktivlikdir. Bunun üçün iştirak edəcəyiniz dərslərdə maksimum 5 nəfər olmasına (belə olduqda məşqçi hər tələbəyə daha çox vaxt ayıra bilir) diqqət edin. Və insanların zala axın etdiyi saatları deyil, daha sakit və asudə vaxtlara dərslərinizi salmağa çalışın.

Pilates dərsinə hər gün getməyin. Pilatesi sevə bilərsiniz. Hər gün pilateslə məşğul olmaq üçün asudə vaxtınız olsa da, gündəlik məşqlərə davam etməyiniz tövsiyə edilmir.  Çünki əzələlərinizin itirdiyi gücü istirahət edib qazanmağa ehtiyacı var. Bu təbii ki, 15 gündə 1 dəfə dərsə getmək mənasını vermir, sadəcə həftədə 3 dəfə etməyiniz kifayətdir.

Uyğun geyinin. Uyğun geyimləri seçmək sizə hərəkət sərbəstliyi yaradır. Nə çox dar, nə də çox boş geyinməməyə diqqət edin. Corab geyinməyi unutmayın. Bu məşqlərin ayaqqabısız edildiyini nəzərə alsaq, ayaqlarınızı qorumaq üçün coraba ehtiyacınız olacaq.

Məşqləri özünüzə uyğunlaşdırın. Mata uzananda narahat hiss edə, yaxud nə edəcəyinizi bilməyə bilərsiniz. Bu çox normaldır. Lakin dərslər davam etdikcə özünüzə inamınız artacaq və daha çox irəli getməyə çalışacaqsınız.

Diqqətli olun, məşq əsnasında edəcəyiniz “səhv” bir hərəkət yaralanma səbəbiniz ola bilər. Bədəninizin imkanlarını bilin və ona uyğun davam edin. Bu sizin məşqi inkişaf etdirə bilməyəcəyiniz mənasını vermir, sadəcə mərhələli şəkildə irəliləməli olduğunuzu bilməlisiz.

Məşq yoldaşınız nə edirsə, təkrarlamalı deyilsiniz, pilates kimin daha yaxşı ətraflarını əsnətdiyini sübut edən bir vasitə deyil, sağlamlığınız üçün əhəmiyyətli məşqlər toplusudur. Sadəcə nə edə biləcəyinizə və məşqçinizin sizə nə öyrətdiyinə diqqət edin.