![Köpük rulonları nə işə yarayır](https://esport.az/uploads/posts/kopuk-rulonlari-ne-ise-yarayir.jpeg)
Köpük rulonları nə işə yarayır
Getdikcə daha çox insan məşqdən əvvəl, yaxud sonra köpük rulonlarından istifadə edir. Bugünkü yazımızda köpük rulonlara ətraflı göz gəzdirib, bilməli olduqlarınızı sizinlə bölüşəcəyik.
Köpük rulonlar müxtəlif materiallardan hazırlanan silindir şəkilli avadanlıqdır. İstifadəçilər rulonların üzərində bədən ağırlıqlarını istifadə edirlər və müəyyən əzələ qrupunu ya işlək vəziyyətə gətirirlər, yaxud da rahatlatmağa çalışırlar.
Bu rulonlar haqqında iki fərqli baxış bucağı var:
- İlk iddia, köpük rulonların bədənin elastikliyini artırdığı və bədəni ağrılardan uzaq tutması ilə əlaqədardır.
- İkinci iddia, daha az müdafiə edilən iddia isə, bədənin atletik vəziyyətini yaxşılaşdırması ilə əlaqəlidir.
Köpük rulon nə işə yarayır? Yuxarıda da qeyd etdiyimiz kimi, məşq seansından əvvəl əzələləri isitməyə, yaxud məşq bitdikdən sonra əzələləri rahatlatmağa kömək edir. Köpük rulon istifadəsinin aşağıdakı faydaları var:
- Qan dövranını yaxşılaşdırır
- Fiziki aktivlikdən, yaxud iş şəraitindən asılı olaraq yaranan əzələ düyünlərini açmağa kömək edir
- Əzələ gərginliyini aradan qaldırır
- Əzələ stressini azaldır
- Elastikliyi artırır
- Hərəkət qabiliyyəti problemlərini həll edir
- Yaxşılaşmış qan dövranı ilə qida maddələri orqanizmdə daha yaxşı daşınır
Köpük rulonu necə istifadə edilir? Məşqlərinizə köpük rulon əlavə etməyi düşünürsüzsə, iki məsələni göz önündə tutmalısız: material və sərtlik.
İki cür rulon növü var: sərt və daha az sərt. Yeni başlayırsızsa, daha az sərt rulonu sınamalısınız.
Daha sonra, rulona bədən ağırlığınızla güc tətbiq edin. Rulonla olan praktikanız artdıqca tətbiq etdiyiniz gücü artırın. Güc miqdarını mərhələli şəkildə artırsanız, yaralanma riskini də aradan qaldırmış olacaqsınız.
Başlanğıc. İlk olaraq üzərində işləmək istədiyiniz əzələ qrupunu seçin və güc tətbiq edin. Əvvəlcə ayaq əzələlərinizlə başlaya bilərsiniz.
Gücü müəyyən etdiyini bölgələrə tətbiq edin və bir neçə saniyə orda tutun. Sonra dizinizi yana çevirin və istədiyiniz qədər əzələ bölgəsini əhatə edin.
Proses ərzində oynaq ətraflarınıza həssaslıqla yanaşdığınıza əmin olun. Bu bölgə həssas toxumalarla doludur. Özünüzü incidə bilərsiniz.
Məşq seansından sonra, yaxud hər hansı ağrı hiss etdikdən sonra rulon istifadə edəcəksinizsə, həmin bölgəyə bir neçə saniyə güc tətbiq edin, daha sonra rulonu həmin bölgənin ətrafında 15 saniyə boyu gəzdirin.
Köpük rulonları həm isinmədə, həm də məşq sonrası bədəninizi soyutmaqda istifadə edə bilərsiniz, hər iki halda faydalı və effektli avadanlıqdır.