Kim sevirsə idmanı, 1, 2, 3, 4!

Sağlamlığınıza və çəkinizə diqqət edirsinizsə, fitness çox uyğun variant ola bilər. 1910-cu illərdə stretching məşqləri ilə başlayan fitnes, 1930-cu illərdə daha gimnastik hərəkətlərlə rəngləndi. Bəlkə də 1990-cı illərdə çoxumuz hər səhər televizoru yandıranda qarşılaşdığımız idman verilişlərini xatırlayırıq.

Fitnesin bir neçə növü ilə yəqin ya tanışsınız, ya da ən azından adını eşitmisiniz; pilates, step, crossfit, aerobika, aqua aerobika, zumba, fitbox və s.

Step - xüsusi bir platformadan istifadə edilərək yerinə yetirilən omba və aşağı ətraflar üçün nəzərdə tutulan fitnes növüdür.

Aqua aerobika – suda musiqi ilə məşqlərin edildiyi unikal bir idmandır.

Crossfit, fitnesin alt növlərindən biridir. Dərslərin məqsədi ümumi fiziki inkişafı yaxşılaşdırmaq, dözümlülüyü, reaksiya dərəcəsini artırmaqdır.

Pilates, bədənə daha zərif bir görünüş vermək üçün edilən məşqlər toplusudur. Bu, cinsindən, yaşından, çəkisindən və bədən quruluşundan asılı olmayaraq hər kəsin tətbiq edə biləcəyi universal bir idman növüdür.

Fitnes yoqa klassik fitnesə əla alternativdir, aktiv məşqlərin ritminə və intensivliyinə dözə bilməyənlər üçün uyğundur.

Fitbox, aerobik gücə malik məşqlər kompleksidir. Məşq güc və dözümlülüyünüzü artırmağa, yağları daha sürətli yandırmağa, əzələləri sıxmağa və ümumi bədən şəklinizi yaxşılaşdırmağa kömək edir. Fitnesin istənilən növü çəki itirməyə və yağ yandırmağa kömək edir, bədənimizdəki yağları əzələ toxumasına çevirir. Aktiv məşqlər qan dövranını yaxşılaşdırır, ifrazat sisteminin daha səmərəli işləməsinə kömək edir. Dəri elastiklik və sağlam bir parıltı qazanır, ümumi rifahı yaxşılaşdırır, bir sıra xroniki xəstəliklərin qarşısını alır. Fitnes məşqləri zamanı beynimiz endofrin hormonu ifraz edir və buna görə özümüzü daha gümrah hiss edirik. Həmçinin, təcrübələr göstərir ki, fitneslə məşğul olanlar olmayanlara nisbətən daha az stressli və əsəbi olurlar.

Fitnesin də hər idman növü kimi mənfi cəhətləri var. Dərslər effektini ilk aylarda göstərməyə bilər. Və məşq zamanı diqqətli olmasanız, əzələ yırtılmaları kimi müxtəlif dərəcəli xəsarətlər ala bilərsiniz.

Fitneslə istər evdə, istərsə də idman zalında məşğul ola bilərsiz. Ancaq yadda saxlamaq lazımdır ki, crossfit, fitnes yoqa, fitbox və bu tipli idman növlərinin effektini idman zalında müntəzəm məşğul olduqda görə bilərsiniz. Həmişə sağlam olmağınız diləyi ilə!