Crossfit - maraqlı, sürətli, faydalı

Hal-hazırda internet əsrində yaşayırıq. İstədiyimiz məlumatları əvvəlki kimi kitabdan yox internetdən əldə edə bilirik.  Bu şəraitdə isə normal olaraq, əksəriyyətimizin gününün müəyyən hissəsi sosial şəbəkələrdə keçir. Biz müxtəlif məlumatlar, şəkillər, saytlar, proqramlarla tanış oluruq. Bu şəraitdə də bir çox şeylə maraqlanmağa başlayırıq. İnternetdə gəzən zaman aktual olaraq qarşılaşdığımız bir şey isə fitness və sağlam qidalanmaqdır.

Hər birimizin ən azı bir dəfə belə olsa fitness mövzusunda hər hansı bir məqalə diqqətimizi çəkib və biz onu gözdən keçirmişik.  Sosial şəbəkələrin bir çoxunda fitnesslə bağlı məqalələr, şəkillər vardır. Bu özü gün keçdikcə bu sahəyə olan maraq artımının göstəricisidir. Bu məlumatlara əsasən artıq sıravi insanlarında fitness barədə fikirləri formalaşır və nəyə ehtiyacları olduğunu anlayırlar. Bu şəkildə paylaşılıb marağımızı çəkən bir çox məşq növləri vardır. Crossfitdə belə məşq növlərindən biridir.

Bir çox idman növlərinin, məşq üsullarının mövcud olduğu bu dövrdə niyə crossfitlə məşğul olmaq lazımdır sualı bir çoxunun ağlından keçir. İdmanla məşğul olanların əsas məqsədi vücudumuzu ideal vəziyyətə gətirmək, gücünü və dözümlülüyünü artırmaqdan ibarətdir. Crossfitdə ilk olaraq bədənin gücünü və dözümlülüyünü artırmağa yönəlir və crossfiti digər məşq növlərindən ayıran başlıca səbəb isə fiziki cəhətdən tam hazırlanmış insanları yetişdirməkdir. Crossfit dedikdə, müxtəlif vaxt intervallarında yüksək intensivliklə həyata keçirilən, davamlı olaraq dəyişən funksional hərəkətlərdən ibarət olan bir məşq üsulu başa düşülür.

Crossfit digər məşq növlərindən fərqlənir. Bəs digər məşq növlərindən seçilən əsas fərq nədir deyə düşünə bilərik. Crossfiti digər məşq növlərindən fərqləndirən əsas cəhət onun on fiziki aktivliyi, yəni ürək-damar sistemi, dözümlülük, iş qabiliyyəti, güc, elastiklik, partlayıcı qüvvət, sürət, koordinasiya, çeviklik və tarazlığın inkişafını hədəfləyib bunu əhatə etməsidir.  Məşq zamanı bir müddət sonra eyni hərəkətlərdən, məşq proqramından sıxılırıq, crossfitdə isə standartlaşmış bir məşq proqramı yoxdur. Crossfit zamanı bədənin bütün əzələləri aktiv şəkildə hərəkətdə olur. Bu səbəbdən yalnız bir hissə deyil vücüdumuz paralel olaraq inkişafda olur. Burdan bu qənaətə gəlirik ki, crossfit güc, dözümlülük və çevikliyi özündə birləşdirir və bunlardan istifadə edərək inkişafa yönəlir. Bununla əlaqədar olaraq crossfit məşqi ümumiyyətlə üç hissə şəklində bölünür və bunları daxilində birləşdirir : ağır atletika, gimnastika və kardio.

Bizi maraqlandıran başlıca məsələlərdən biri isə bu zaman nə ilə qidalanmalı olduğumuzdur. Əslində peşəkarlar bu sahə ilə maraqlananlar üçün xüsusi bir yemək proqramı təklif etmirlər.  Crossfit zamanı bizim vücudumuz aktiv şəkildə fəaliyyət göstərir, hətta digər növlərlə müqayisədə daha çox enerji və kalori itiririk. Əsas  məsələ ən azı itirdiyimiz qədər kalori qəbul etməyimizdir.  Bunu etmədiyimiz təqdirdə vücudumuz gücdən düşə, immunitetimiz zəifləyə bilər. Nə ilə qidalanmağımızdan aslı olmayaraq sağlam qidaları qəbul etmək bizim üçün vacibdir. Lakin bu məşq üsulunda özümüzü sıxmalı çox ağır pəhrizlər saxlamalı deyilik, ona görə ki bu məşq zamanı bədəndə olan əzələlə bərkiyir və yağlar isə əriyir. Vücudumuzu lazımlı liflər, proteinlər ilə qidalandırmaq bizim üçün yetərli olacaqdır.

Sosial şəbəkələrdə gəzindiyimiz zaman fitness ilə məşğul olanlar ilə qarşılaşır, onların necə məşq etməyi ilə azdan-çoxdan tanış oluruq. Əsasən çətin şəkildə məşq edənləri görüb, narahat oluruq. Bunlar sizi qorxutmasın. Unutmayaq ki, onlar peşəkarlardır və birdən-birə o hərəkətləri etməyə başlamayıblar. Onlarda adi sıravi insanlar kimi ən başdan başlayıb, addım-addım hərəkət edib, çalışıb bu nəticələrə nail olublar. Hər şeyin ilki çətindir. Bu hər mövzuda belədir. Yadımıza salaq məktəbə başladığımız zaman bizim üçün evdən ayrılmaq, əlifbanı öyrənmək necə də çətin idi. Əsas məsələ məqsəddən əl çəkməməkdən onun üçün çalışmaqdan ibarətdir. Nəyə isə nail olmaq üçün  dayanmadan addım atmalıyıq. Nə qədər zamana nə qədər məsafə qət etdiyimiz deyil, dayanmamağımız, addım atmağımız önəmlidir. O zaman nə gözləyirsiz? Başlamağın bəlkə də tam zamanıdır. Qorxmağa ehtiyac yoxdur. İdman kiməsə göstəriş üçün edilmir. İdman bizim ağır günümüzün sonunda çəkdiyimiz əziyət deyil. Tam əksinə bu bizim bədənimizin mükafatıdır.