Yoqanın mənəvi köməyi

İdman növü hesab olunan yoqanı təkcə idman növü adlandırmaq düzgün olmaz. Yoqa insanın fiziki sağlamlığına kömək etdiyi kimi, həmçinin, insanın mənəvi cəhətdən inkişafına, mənfi enerjini dəf etməsinə, daha gümrah olmasına, problemlərlə rahat mübarizə aparmasına, sağlam fikirlərin təməlinin formalaşmasına kömək edir. Tarixçəsi qədim zamanlara dayanan yoqanın hal-hazırda Azərbaycanda da inkişafda olması sevindirici haldır. İndi ölkəmizdə yoqa ilə məşğul olan zallar mövcuddur, həmçinin, sərbəst şəkildə də yoqa ilə məşğul olan şəxslər sürətlə artır. Evdar xanımlar, gənclər hətta uşaqların belə yoqaya marağının artması çox gözəl hal hesab olunur. Bu zaman insan təkcə idman etmiş sayılmır, həm də ruhun təmizlənmə prosesini də həyata keçirir.

     Yoqa zamanı əhəmiyyətli məsələlərdən biri düzgün şəkildə nəfəs alıb-vermək, alınan nəfəsi ciyərlərimizdə hiss etməkdir. Hətta alimlər sübut etmişlər ki, bu proses təkcə mənəvi cəhətdən deyil, həm də bədənin düzgün şəkildə inkişafına, fiziki cəhətdən rahatlanmasına kömək edir. Yoqanın faydalarını sadalamaqla bitirmək mümkün deyil. Yoqa tənəffüs və həzm sisteminin sağlamlığına kömək edir, təzyiq xəstələrinin təzyiqini stabil saxlayır, şəkər xəstələrinə kömək edir, qan dövranını nizama salır, bel ağrılarına yaxşı təsir göstərir, depressiya və pis fikirlərdən insanı uzaq tutur.

     Yoqa insanın ruhi vəziyyətinin də sakitləşməsinə, rahatlamasına səbəb olur. Yoqa yalnız fiziki funksiyalarda rol oynamır. Yoqa ilə məşğul olunan zaman dünya ilə əlaqələr kəsilir və ancaq öz dünyasında fəaliyyət göstərilir. Zehnin dərinliklərində  narahat edən, düşündürən problemlərdən uzaqlaşılır. Beyin təmizləndiyi üçün neqativ enerjilərdən uzaqlaşılır. İçi rahat, sakitləşmiş beyinlə artıq daha düzgün baxış açısından baxır, əsəbləşib neqativ enerjilərlə yüklənmək əvəzinə sakitliyini qoruyub çıxış variantları axtarmaqa çalışır.

     Əslində yoqanın buradakı rolunu bir çox şəxs ya tam anlamır, ya da gözucu baxıb mənim ehtiyacım yoxdur deyir. Halbuki, insanın yaradılışından cansız varlıqlardan fərqli olaraq hiss duyğusuna sahibdir. Hisslər bizim həyatımızda  mühüm yer tutur deyə bilərik. Hər cür duyğu buna aiddir: sevgi, qorxu, həyəcan, nifrət, kin, ağrı, sevinc, kədər və s. Bunların hamısı bizim həyatımızı yönləndirir Hisslər bəzən bizim tamamilə ziyanımıza hərəkət edib bizi tamamilə depressiyaya sala, məhv edə bilər. Bu sonluq sözsüz ki, bu şəraitdə normal hal hesab olunacaqdır.

     Hər bir insan tamamilə hisslərini idarə edə bilmir. Tez təsir dairəsinə düşüb zərər çəkənlər də olur. Yoqa isə bu zaman köməyə gələ bilər. Yoqa zamanı insan tamamilə sakitləşib, rahatlayır. Bu halda beyin boşalır və ziyan verən funksiya refleksləri öz rolunu itirir. Sonra isə sakitləşib, tamamilə hər şeydən təmizlənən beyin normal şəkildə məsələyə qatıb dəyərləndirilir. Əgər insan tamamilə hissləri ilə yaşayıb fəaliyyət göstərərsə, o zaman həyat tərzi get-gedə pisləşər. Neqativ enerjilərin dayanmadan fəaliyyət göstərib dövr etdiyi üçün depresiv moda girər. Buna görə də yoqa bizə kömək olur. Hisslərimizi yığmağa çalışmaq elə də asan deyil. Lakin beyin və hisslər bir-biri ilə qarşılıqlı əlaqədə olmalıdır. Yoqanın əsas məsələlərindən biri də hissləri normaya salmaq və müsbətə doğru irəlilətməkdir. Onun qarşısında olan əsas məsələlərdən biri də mənfi şüuraltı istəklərdən uzaqlaşmaq, müsbət enerji ilə fəaliyyət göstərməyə çalışmaqdır.

     Qədim zamanlar bu sahə ilə məşğul olan şəxslər düşüncələrin reallığa çevrilmə məsələsini irəli sürüb.  Əgər müsbət enerji ilə özümüzü yükləsək, dünyaya istəyimizi, müsbət enerjimizi göndərsək qarşılığını da belə alacağıq. Dünyaya göndərdiyimiz enerjini dünya bizə geri verəcək deyə mülahizələr irəli sürüblər.

     Yoqa təlimi keçən Natella Əliyevanın da fikirlərini öyrəndik. O, qeyd etdi ki, dörd-beş ildir ki, yoqa ilə məşğul olur:
“Yoqa təlimlərinin beş min illik tarixi var. Etdiyimiz aerobrika hərəkətləri elə yoqaya dayanıb. Yoqaya başlamazdan əvvəl sağlamlığında bəzi problemlərim var idi. Lakin hazırda onlardan azad olmuşam. Ümumiyyətlə hər bir şəxs yoqa ilə məşğul olmalıdır, bu onlar üçün vacibdir”.