Sağlam bədən üçün velosipedin rolu

Ömrümüzün müxtəlif mərhələlərində fərqli məşğuliyyətlərə yiyələnirik. Bunlar bizim həyatımızı daha səmərəli keçirməyimizdə əvəzsiz rol oynayır. Zövqdən asılı olaraq seçdiyimiz məşğuliyyətlər isə dəyişə bilir. Uşaqlıqdan zövqümüz əsasında seçimlərimiz dəyişərək formalaşmağa başlayır. Zamanla və ətrafımızla əlaqəli olaraq da bu seçimlər formalaşa, dəyişə bilir. 

Seçimləri etdiyimiz zaman digər əsas məsələlərdən biri isə sağlamlığımızdır. Həkimlər isə daima sağlamlıq üçün idmanla məşğul olmağı bizə məsləhət görürlər. Beləki, idmanla məşğul olan insanların sayı get-gedə artmaqdadır. Bu artış müxtəlif idman növlərində özünü göstərməkdədir.

Sağlamlıq üçün idmanla məşğul olmağın vacibliyini həkimlər hər zaman qeyd edirlər, lakin bəzi problemlərə görə idmandan uzaq durmalı oluruq. Bunun müxtəlif səbəbləri ola bilər. Amma idmandan tamamilə uzaqlaşmaq çıxış yolu deyil. Əsas məsələ isə bu səbəbləri aradan qaldırmaqdır. Əgər idmandan  sağlamlığınızla bağlı problemlərlə əlaqədar olaraq uzaqlaşırsınızsa, bunun əvəzinə daha yüngül idman növləri ilə məşğul ola bilərsiniz və bu sağlamlıq üçün daha çox faydalı olacaqdır. Bu tip idman növlərindən biri də velosiped<\/a> sürməkdir. 

Günümüzdə aktual olan idman sahələrindən biri velosiped sürməkdir. O bizim sağlamlığımızda əvəzsiz rol oynayır. Velosiped zehni qabiliyyətləri də gücləndirir. Beyinə gedən qan və oksigen axınını artırır, reseptorların hərəkətini aktivləşdirir və bərpa edir, hipokampusda(yaddaş üçün məsul hesab olunan ərazi) yeni beyin hüceyrələrinin yaranmasına kömək edir.

Daxili orqanların daha aktiv şəkildə fəaliyyət göstərməsinə səbəb olan velosiped ürək, qan-damar sistemimizi yaxşılaşdırır. Varikoz damarlarının yaranmasının qarşısını alır. Genetik olaraq varikoz damarlarına meyilli insanlar üçün pedal çevirmək çox faydalıdır. Ayaqların pedal ilə hərəkəti nəticəsində qan heç bir yerdə dayanmadan bütün qan damarları boyunca dövr etməyə başlayır.

Bir çoxumuzun əsas problemlərindən biri isə göz zəifliyidir. Müxtəlif yaş dövrlərində gözlərimiz zəifləyə bilir. Velosiped bu cəhətdən də faydalıdır. Beləki,  velosiped sürmək gözlər üçün məşq  hesab olunur. Passivləşmiş gözlər məşq edib aktivləşir. Mütəxəssislər velosiped sürən zaman gözlərin sağa-sola hərəkətini göz üçün məşq hesab olunduğunu qeyd edirlər.

Gün keçdikcə artıq çəkidən əziyət çəkənlərin sayı artmaqdadır. Bunun səbəblərdən biri isə passiv şəkildə yaşamağımızdır.  Bunun qarşısını almaq üçün ağır idman növləri ilə məşğul olmaq əvəzinə velosiped sürmək daha yaxşı üsuldur. Velosiped sürərkən bütün bədən fəaliyyətdə olduğu üçün bədənin yalnız bir hissəsinə ağırlıq düşmür, həmçinin, bədənin bütün hissələri bərabər şəkildə fəaliyyət göstərir. Həm də artıq çəkidən əziyət çəkən zaman velosiped daha əlverişlidir. Çünki adi idman zamanı diz qapağına yük düşə və zədələnə bilər. Velosiped sürən zaman isə belə hadisələrlə qarşılaşılmır, sağlam şəkildə idman edilir.

Velosipedin faydası yalnız sağlamlığımızda özünü göstərmir. Günümüzdə maşın, avtobus kimi bir çox nəqliyyat vasitələtindən istifadə velosipedə nisbətən daha çoxdur. Lakin, maşın və digər  nəqliyyat vasitələri ilə müayisə zamanı bir çox üstünlüklərini görə bilərik. Velosiped maşınlardan fərqli olaraq ekoloji dostdur. O  tullantılarla təbiəti çirkləndirmir. Sadədir və yüksək manevrə malikdir. Bu xarakterinə görə isə digər nəqliyyat vasitələri ilə müqayisədə istifadəsi daha asandır. Həmçinin, bu üstünlüklərə baxmayaraq qiymət baxımından da ucuzdur. Bunlar isə bizim həyatımızı rahatlatmağımıza kömək olur.

Hal-hazırda maşınlara tələbat artsa belə biz ümid edirik ki, velosipeddən istifadə azalmayacaq. Çünki gündəlik qısa məsafələrə belə maşınla getmək həm təbiətə zərər vurur, həm də bizi tənbəlləşməyə aparıb idmandan uzaqlaşdırır. Bu hallardan bacardığımız qədədr uzaqlaşmalıyıq.  Bəs siz necə həyatınızda velosipedə yer ayırmısız?