Məşq zamanı rahat paltarın əhəmiyyəti

Düzgün şəkildə edildiyi müddətdə idman faydalıdır. Bu, hərəkətləri düzgün etməyinizdən, sağlam qidalanmanızdan, kifayət qədər maye qəbul etməklə yanaşı, hər nə qədər inandırıcı gəlməsə də, düzgün geyimlərdən asılıdır. Məşqlərinizdən maksimum faydalana bilmək üçün rahat paltarlar geyinmək vacib arqumentdir.

Mövzu fiziki fəaliyyət olduqda bəzi insanlar şkafdan tapdıqları ilk paltarları geyinməyə meyilli olurlar. Bunlar əsasən, t-shirt,  geniş şalvar tipli geyimlər olur.

İdman edəcəyimiz paltarları seçərkən diqqətli olmalıyıq. Bu hamının təsdiqlədiyi, lakin bir çoxumuzun göz ardı etdiyimiz bir şeydir. İdman əsnasında bizə çətinlik yaratmayacaq paltarlar geyinməliyik.

Uyğun olmayan paltarlar geyinəndə dəri sürtünməsindən burxulmaya qədər ciddi xəsarətlər ala bilərik. Bunları yaşamamaq üçün, idman paltarı seçiminə vaxt ayırmalıyıq.

İdman edərkən rahat paltarlar geyinməyən bir çox insan var, çünki rahat idman paltarların baha olduğunu düşünürlər. Əslində isə belə deyil.

İdman edərkən rahat paltar seçiminizdə sizə bir neçə ipucu verək:

Pambıq, yaxud likradan (lycra-elastik material) hazırlanmış şort və ya şalvar seçin. Bu materialda geyimlər dərinizin nəfəs almasına və daha rahat hərəkət etməyinizə kömək edəcək.

Bədəninizi ən yaxşı siz tanıyırsız və allergik reaksiya yarada biləcək materiallardan, həmçinin, sürtünmə yaradacaq paltarlardan uzaq durun.

Təri tez əmən xüsusi idman paltarları var ki, tərinizi tez əmdiyindən daha rahat məşq edə bilirsiniz.

Yaralanmaların qarşısını almaq üçün başlıq və dizlik kimi idman aksesuarlarından yararlana bilərsiniz.

Açıq havada idman edəcəksizsə, hava temperaturunu nəzərə alın. Hava istidirsə, rahat, nəfəs alan geyimlər seçin. Boş paltarlar bədəninizdəki hava axınını tənzimləyəcək və tərin daha tez buxarlanmasına kömək edəcək. Günəş şüalarından qorunmaq üçün açıq rəngli geyimlər seçin.

Soyuq havada idman edirsizsə, isindikcə rahat çıxara biləcəyiniz paltarlar geyinin. Üst geyiminiz havanın isindiyi halda bədəninizə nəfəs aldıracaq havalandırma xüsusiyyətinə sahib olmalıdır. Ağciyərlərinizi soyuqdan qorumaq üçün şərf və ya boğazlıqdan istifadə edə bilərsiniz. Əllərinizin və ayaqlarınızın istiliyini təmin etmək üçün yun corab və əlcəklər köməyinizə çatacaq.

İstənilən hava şəraitində baş qorunması vacibdir. Soyuq aylarda başımızı soyuqdan mühafizə etmək üçün isti bir papaq, isti aylarda isə günəş şüalarından qorunmaq üçün yüngül kep istifadə edə bilərsiniz.

Geyiminiz hərəkətlərinizi sərhədləməməlidir. Məsələn, cins geyimlər sizə istənilən rahatlığı və sərbəstliyi təmin edə bilməyəcək.

Geyimdə nə qədər rahat hiss etsəniz, nəticəniz bir o qədər uğurlu olacaq. Psixoloji olaraq geyindiyimiz paltarların rahat olmağı ilə yanaşı, yaraşdığına da inanmalıyıq. Bu hislər özümüzə inamı təmin etdiyindən daha inamlı və gümrah idman edəcəksiniz.

Geyimimizin ayrılamaz hissəsi ayaqqabılardır. Və ayaqqabılar hər idman növü üçün fərqli seçilməlidir. Qaçış üçün fərqli, idman zalı üçün fərqli idman ayaqqabıları mövcuddur. İdman ayaqqabısı seçərkən diqqət etməli olduğumuz məqamlarla aşağıdakı keçiddən tanış ola bilərsiniz:

https://esport.az/blog/idman-ayaqqabisi-secimini-nece-etmeliyik

Nəticə etibarı ilə, etdiyimiz məşqlərdən istədiyimiz nəticəni əldə etmək istəyiriksə, geyimimizə bir az vaxt ayırmalıyıq. Hazırda onlayn platformalar bizə saysız seçim imkanı verir və mağazaya getməyə ehtiyac qalmır.