İdmancılar üçün təməl qidalanma qaydaları

İdmançıların qidalanması son illərdə çox araşdırılan və tez-tez müzakirə edilən mövzulardan olmaqla, nəinki idmançıları, həmçinin, məşqçiləri, idmançı ailələrini, idmanla məşğul olan və ya maraqlanan hər kəsin diqqət mərkəzindədir.

Sağlam qidalanma idmançının ehtiyac duyduğu enerji və qida maddələri ilə yanaşı, lazımi maye qəbulunu da tələb edir. İdmançılar üçün tövsiyə edilən möcüzəvi qida, yaxud qidalanma rasionu olmasa da, idmançıların qidalanması məşğul olduğu idman sahəsinə, yaşa və  görə dəyişir. Bu qidalanma proqramı təbii ki, xüsusi diyetoloqlar tərəfindən hazırlanır və idmançıların da bu rasiona əməl etməkləri tələb olunur.

Ümumi olaraq, idmançıların karbohidratla zəngin pəhriz siyahısı ilə qidalanmağı, protein, vitamin və mineralları lazımi miqdarda qəbul etməsi, yağdan alınan enerji miqdarının idmanla məşğul olmayan insanlara nisbətən daha az olması məsləhət edilir.

Sağlam qidalanma idmançı üçün heç bir qeyri-adi uğur gətirməsə də, kifayət qədər müsbət tərəfləri var. Qidalanmasına nəzarət edən idmançının fokuslanmada və diqqətini toplamaqda heç bir problemi olmur. Performans göstəricisi daha yüksək olur. Yaralanma riski az olur və yaralansa belə sağalma müddəti daha sürətli olur. Orqanizmin ağırlığı və bədəndəki yağ miqdarı məsləhət edilən həddə, yaxud bu həddə yaxın ölçüdə olur.

Qidalanmanın əsas ünsürlərindən biri də maye qəbuludur. İdmançılar normal insanlardan daha çox mayə qəbul etməlidirlər. Amerikada aparılan bir araşadırmaya görə (2012) idmançıların məşq zamanı düzgün miqdarda mayə qəbul etməsi qan təzyiqini və şəkərini normada saxlamağa kömək edir. Məşqlərdən 2-3 saat əvvəl 400 – 600 ml mayə qəbul edilməsi məsləhətlidir. Bu məşqdən əvvəl optimal maye miqdarını tənzimlədiyi kimi, bədəndəki artıq mayenin atılması üçün lazım olan vaxt aralığıdır.

İdmançıların qidalanması gün ərzində 3 mərhələdə həyata keçirilir; məşqdən əvvəl, məşq əsnasında, məşqdən sonra.

Məşqdən əvvəl karbohidratla zəngin menyu ilə qidalanmalısınız. Məşq əsnasında itirdiyiniz enerjini idmançı içkiləri ilə bərpa edə bilərsiniz. Və məşqdən sonra əzələləriniz boşaldığına və yüksək miqdarda enerji itirdiyinizə görə, 2 saat ərzində enerjinizi yüksəldəcək və əzələlərinizi bəsləyəcək qidalar yeməlisiniz.