Düşüncə və bədən tarazlığının vəhdəti - Snowboard

Snowboard – bədəninizlə birlikdə beyninizin də sürətlə çalışdığı idman növüdür. Snowboard çox güclü diqqət tələb etdiyinə görə (board üzərində qala bilmək üçün tarazlığı həmişə nəzarətdə saxlamaq lazımdır), snowboardla məşğul olan biri güclü əzələlərlə yanaşı, həm də tarazlıq hakimiyyəti qazanır.

Snowboard cəsarət tələb edir. Qarlı bir təpədən üzüaşağı özünüzü azad bir şəkildə buraxanda bütün bədəninizin məsuliyyətini ayaqlarınız daşıyır. Bu gün sizlə hər saniyəsi adrenalinlə dolu olan snowboard haqqında bəzi məlumatları bölüşəcəyik.

Snowboarda başlamazdan əvvəl 8 saatlıq bir təlimdən keçməlisiniz; 2 saat təməl biliklərdən ibarət, 4 saat normal bir ərazidə sürüşmə və 2 saat texniki məlumatların öyrədildiyi təlimlər.

Təliminizi uğurla bitirəndən sonra tək sürüşə bilərsiniz. Sürüşməkdə ən vacib şərt tarazlığınızı qoruya bilməkdir. Bunun üçün ayaqlarınıza və beyninizə çox iş düşür. Sol ayağınızı taxtanın üstündə irəli qoyanda bədənin bütün ağırlığı sağ ayaqda, sağ ayağınız irəlidə olanda isə ağırlığınız eyni şəkildə sol ayağınızın üzərinə düşür. Amma idmançıların əksəriyyəti bədən ağırlıqlarını hər iki ayağının üstünə sala bilirlər.

Snowboard üçün başqa bir şərt düzgün board seçməkdir. Seçim edərkən taxtanızın elastikliyinə, rahat dönüşlər edə biləcək “soft” materialda olmasına diqqət edin və taxtanızın uzunluğu çənənizi keçməsin. Ağırlığınıza uyğun bir board seçməyiniz məsləhətlidir ki, dönüşləri rahat edə biləsiniz və qarda batmayasınız.

Geyim seçərkən daha boş şalvar və köynəklər seçməyə, qat - qat geyinməyə diqqət edin. Paltarınızın ilk qatının pambıqdan olmasına xüsusi fikir verin. Ən əsas isə yeni başlayanların tez tez yıxıldığını nəzərə alsaq, çalışın paltarlarınız su keçirməz olsun. Təbii ki, şərf papaq və eynək snowboardın ayrılmaz aksesuarlarıdır.

Qidalanmanıza fikir verin, səhər yeməyində mütləq bal, qaymaq, pendir, yumurta olmasına çalışın, naharda proteinli qidalara üstünlük verin və şam yeməyində mütləq gün boyu itirdiyiniz enerjinizi qazanmaq üçün yaxşı yeyin.

Unutmaq lazım deyil ki, yay günəşi kimi qış günəşi də yandırıcı və dəri üçün təhlükəli olur. Onun üçün günəşdən qoruyucu kremlər çəkməyi, dodaq və dəri çatlarının qarşısını almaq üçün nəmləndirici istifadə etməyi ehmal etməyin.

İlk vaxtlar snowboard sizə çox qorxulu və çətin gələ bilər. Lakin sürüşməyə davam etdikcə əksinə çox əyləncəli və asan olduğunu görəcəksiniz.