social icons

EV ƏŞYALARI İLƏ EVDƏ MƏŞQ EDİN

$blog->name

Dünya Covid-19 virusu ilə çalxalandığı dövrdə, biz insanların öhdəliyinə düşən əsas məsələ, yoluxma hallarının qarşısını almaqdır. Bunun üçün maksimum şəkildə evdən çıxmadan, başqalarına və ən əsas  özümüzə təhlükə yaratmamağa çalışmalıyıq. Amma bununla yanaşı, immunitetimizi də qorumalıyıq. Biz də bu gün evdə, ev əşyaları ilə edə biləcəyiniz məşqlərdən danışacağıq. Evdən çıxmasaq da, ev şəraitində də sağlamlığımızı gücləndirmək üçün məşq edə bilərik.

 Evdə məşq etmək həm vaxtınıza, həm də büdcənizə qənaət deməkdir. Amma bildirmək də lazımdır ki, evdə məşq edənlər, idman zallarına gedən şəxslərdən daha tez məşqi dayandırmağa meylli olurlar.

Əslində evdə məşq etmək əladır, çünki insanlar evdə məşq edərkən vaxtlarına daha çox qənaət edə bilirlər. Bu da onlara idman zalına gedərkən yolda itirdikləri vaxtı,  evdə ailə və uşaqları ilə keçirmək şansı qazandırır. Həmçinin, sevimli serialınızı vaxtında izləyə və məşq saatınızı özünüz müəyyənləşdirə bilərsiniz.

Bəs evdə necə məşq edə bilərik? Hansı əşyalardan istifadə edə bilərik? Evdə məşq etmək üçün xəyal gücünüz geniş olmalıdır. Sadəcə dayanın və ətrafınıza yaxşı-yaxşı baxın, hansı əşyaları hansı məşqlər üçün istifadə edə bilərsiniz?

Bir məsələni də xatırladaq ki, evdə fikrinizi yayındıracaq və sizi tənbəlliyə meylli edəcək bir çox nəsnə var; smartfonlar (sosial şəbəkələr), televizor və sizi “çox az dincəlmək” üçün səsləyən divan. Bütün bu şirnikləşdirici vasitələrdən uzaq durmaq iradə tələb etsə də, bu günlərdə bunu bacaracağınıza inanırıq.  

Ev əşyaları ilə məşq. Evdə qantelin olmağı şərt deyil. Onun yerinə dolu su şüşələrindən istifadə edə bilərsiniz. Su şüşəsi yoxdursa, çantalara makaronları, yaxud ağırlıq yarada biləcək nəsnələri yığıb qaldırıb endirə bilərsiniz.

Ağırlıq çubuqlarına ehtiyacınız varsa, əminik ki, hər birinizin evində yerləri silmək üçün istifadə edilən çubuqlardan var. İstər plastik, istərsə də ağacdan olanı. Hər ikisinə ağırlıq bağlayıb məşq edə bilərsiniz. Daha yaradıcı olub, bayram ərəfəsini nəzərə alsaq, oxlov da pis variant deyil.

Kardio məşqi etmək üçün stullardan, boş qutulardan istifadə edə bilərsiniz. Üstlərinə qalxıb enərək əla kardio effektli məşq edə bilərsiniz.

Evdə uşağınız varsa, onların oyuncaqları da köməyinizə çatacaq. Məsələn, isinmə hərəkətləri üçün onlardan iplərini alıb, ip atlayıb isinmə edə bilərsiniz. Toplarını da borca götürüb topla çox sayda məşq edə bilərsiniz.

Bu məşqlər təkcə, Covid -19 virusu ilə mübarizə üçün əhəmiyyətli deyil, bu məşqlər həm arıqlamağınıza, həm ürək-damar sisteminizin möhkəmlənməsinə, həm də ailənizlə daha keyfiyyətli vaxt keçirməyinizə kömək edəcək.


6 gün əvvəl 39